கவலைக்கான தீர்வு

இந்த வாரம் நாம், பிலிப்பியர் 4:6-7-ஐ அடிப்படையாகக் கொண்ட, கவலைப்படாதீர்கள், மகிழ்ச்சியாக இருங்கள் என்ற தலைப்பில் கவனம் செலுத்துகிறோம்:

நீங்கள் ஒன்றுக்குங்கவலைப்படாமல், எல்லாவற்றையுங்குறித்து உங்கள் விண்ணப்பங்களை ஸ்தோத்திரத்தோடே கூடிய ஜெபத்தினாலும் வேண்டுதலினாலும் தேவனுக்குத் தெரியப்படுத்துங்கள். அப்பொழுது, எல்லாப் புத்திக்கும் மேலான தேவசமாதானம் உங்கள் இருதயங்களையும் உங்கள் சிந்தைகளையும் கிறிஸ்து இயேசுவுக்குள்ளாகக் காத்துக்கொள்ளும்.

இன்று, இந்த வசனத்தின் நான்காவது பகுதியான, “... எல்லாவற்றையுங்குறித்து உங்கள் விண்ணப்பங்களை ஸ்தோத்திரத்தோடே கூடிய…” அதாவது “அவர் செய்த எல்லாவற்றிற்காகவும் அவருக்கு நன்றி செலுத்துங்கள்” என்பதில் நாம் கவனம் செலுத்துகிறோம்.

எனவே, நமது தலைப்பை மாற்றி, கவலைப்படாதீர்கள், நன்றி உள்ளவர்களாக இருங்கள் என மாற்றுவோம்.

இது ஒரு பாடல் வரியில் அவ்வளவு சிறப்பாக இருக்காது என்பதை நான் ஒப்புக்கொள்கிறேன், ஆனால் இது கவலையற்ற வாழ்க்கைக்கு ஒரு திறவுகோல்!

நன்றி சொல்வது முக்கியம்; அது வேதாகமத்தில் 150-க்கும் மேற்பட்ட முறை குறிப்பிடப்பட்டுள்ளது.

வேதாகமத்தில் நன்றி சொல்வதற்கான எனது விருப்பமான உதாரணங்களில் ஒன்று, இயேசு ஐந்து அப்பங்களையும் இரண்டு மீன்களையும் உடைத்து 5000-க்கும் மேற்பட்ட மக்களுக்கு உணவாக பெருக்குவதற்கு முன், அதற்காக நன்றி கூறியதுதான் (மத்தேயு 14:19).

ஆண்டவர் அதை வழங்குவதற்கு முன்பாகவே, அவருடைய ஏற்பாட்டிற்காக இயேசு அவருக்கு நன்றி கூறினார்.

இதுவே நன்றி சொல்வதன் வல்லமைகளில் ஒன்றாகும்; இது ஆண்டவர் செயல்படுவதற்கு இடம் தரும் விசுவாசத்தை வெளிப்படுத்துகிறது. உங்கள் ஜெபங்களுக்குப் பதில் கிடைப்பதற்கு முன்பாகவே, அதற்காக ஆண்டவருக்கு நன்றி சொல்லும் பழக்கத்தை ஏற்படுத்திக்கொள்ளுங்கள்.

நன்றி செலுத்துவதன் மற்றொரு முக்கியமான விளைவு என்னவென்றால், அது நம்முடைய கண்ணோட்டத்தை நம்மிலிருந்தும், நம்முடைய கவலைகளிலிருந்தும் ஆண்டவரின் நன்மையை நோக்கி மாற்றுகிறது.

அது ஆன்மீகம் மட்டுமல்ல, அறிவியல் ரீதியாகவும் நிரூபிக்கப்பட்டுள்ளது. ஆய்வுகளின்படி, நன்றி சொல்வது அதிக மகிழ்ச்சி, நேர்மறையான உணர்வுகள், ஆரோக்கிய மேம்பாடு, துன்பத்தைச் சமாளிப்பது, மற்றும் உறுதியான உறவுகளை உருவாக்குவது ஆகியவற்றுடன் தொடர்ந்து மற்றும் உறுதியாகத் தொடர்புடையதாக நிரூபிக்கப்பட்டுள்ளது.

ஆகவே, நான் உங்களிடம் ஊக்குவிக்கவிரும்புவது என்னவென்றால்:

எப்பொழுதும் சந்தோஷமாயிருங்கள். இடைவிடாமல் ஜெபம்பண்ணுங்கள். எல்லாவற்றிலேயும் ஸ்தோத்திரஞ்செய்யுங்கள்; அப்படிச் செய்வதே கிறிஸ்து இயேசுவுக்குள் உங்களைக்குறித்து தேவனுடைய சித்தமாயிருக்கிறது. - 1 தெசலோனிக்கேயர் 5:16-18.

நீங்கள் நன்றியுள்ளவராக இருக்கும் எல்லா விஷயங்களையும் பட்டியலிட இன்று சிறிது நேரம் ஒதுக்குங்கள், இன்னும் நடக்காத காரியங்களையும் அதில் சேர்க்க மறக்காதீர்கள்!