என்னுடைய வாழ்வியல் குறிக்கோள்

சில குறிப்பிட்ட சூழ்நிலைகளில் நீங்கள் உங்கள் மனதில் திரும்பத் திரும்ப சொல்லிக் கொள்ளும் ஒரு எளிய வாக்கியம் உங்களிடம் இருக்கிறதா?

என்னிடமும் இருக்கிறது! சிலர் இதை மந்திரங்கள் என்று அழைக்கிறார்கள் - இது கொஞ்சம் அதிக ஆன்மீகமாக இருப்பதாக நான் நினைக்கிறேன் - ஆனால் அடிப்படையில் இது அவ்வப்போது உங்களுக்கு நீங்களே நினைவூட்டிக் கொள்ளக்கூடிய ஒரு ஒற்றை வரி. எனக்குப் பிடித்தமான சில இங்கே:

• அப்படியே விசுவாசி! மாற்கு 5:36ஐ அடிப்படையாகக் கொண்டது, அங்கே இயேசு மரித்துப் போன தன் மகள் விஷயமாகத் துக்கத்தில் இருந்த ஜெபஆலயத்தலைவரில் ஒருவனாகிய யவீரு என்பவனிடம், "பயப்படாதே, விசுவாசமுள்ளவனாய் இரு" என்று சொன்னார். ஜாக்கின் மருத்துவமனை அறையில் கூட, "அப்படியே விசுவாசி" என்ற பதாகை வைத்திருந்தோம்.
• “உங்கள் இருதயம் கலங்காமலும் பயப்படாமலும் இருப்பதாக.” யோவான் 14:27 ஐ அடிப்படையாகக் கொண்டது.
• “கர்த்தர் எனக்காக யாவையும் செய்து முடிப்பார்.” சங்கீதம் 138:8ஐ அடிப்படையாகக் கொண்டது.

இவற்றை என் மனதில் சில முறை திரும்பத் திரும்பச் சொல்வது என் பிரச்சனைகளிலிருந்து என் கவனத்தை விலக்கி, என் பரலோகத் தந்தையிடம் திருப்புவதற்கு எப்போதும் எனக்கு உதவுகிறது.

இயேசுவின் தாயான மரியாளுக்கும் ஒன்று இருந்திருக்கும் என்று நான் நினைக்கிறேன். தேவதூதன் காபிரியேல் அவளைச் சந்தித்தபோது, மற்றவற்றுடன், "கர்த்தர் உன்னுடனே இருக்கிறார்" என்று சொன்னார் (லூக்கா 1:28).

இந்தத் தொடருக்காக இயேசு பிறப்பின் கதையை மரியாள் பார்வையில் இருந்து பார்க்க முயற்சிக்கும்போது, இனிவரும் மாதங்களில் அவள் இந்தச் சிறிய வரியை எத்தனை முறை தனக்குத்தானே திரும்பத் திரும்பச் சொல்லியிருப்பாள் என்று என்னால் நினைக்காமல் இருக்க முடியவில்லை, "கர்த்தர் என்னுடனே இருக்கிறார்."

திருமணத்திற்கு முன் கர்ப்பமானதால் சமூகத்தில் ஏற்பட்ட அவமானத்தை அவள் எதிர்கொண்டபோது, அவள் தனக்குள்ளேயே, "கர்த்தர் என்னுடனே இருக்கிறார்" என்று முணுமுணுப்பதாக நான் சித்தரித்துப்பார்க்கிறேன். அல்லது அதிக கர்ப்பமாக இருந்தும் பெத்லகேமில் உள்ள ஒவ்வொரு விடுதியிலும் நிராகரிக்கப்பட்டபோது, தனக்குத்தானே, "கர்த்தர் என்னுடனே இருக்கிறார்" என்று நினைவூட்டிக்கொள்வதை பார்க்கிறேன்.

உங்களிடம் வேதத்திலிருந்து எடுக்கப்பட்ட ஒரு ஈர்ப்பூட்டும் வாக்கியம் இருக்கிறதா? என்னுடைய அல்லது மரியாள் வாக்கியங்களில் இருந்து ஒன்றை நீங்கள் தாராளமாகப் பயன்படுத்தலாம்.

அல்லது, இன்னும் சிறப்பாக, உங்களுக்கென்று ஒன்றைத் தரும்படியும், அதை உங்களுக்கு அடிக்கடி நினைவூட்டும்படியும் பரிசுத்த ஆவியானவரைக் கேளுங்கள்.