நான் உனக்காக என்ன செய்யவேண்டுமென்று நீ விரும்புகிறாய்?

“இயேசு கேட்ட 7 கேள்விகளுக்கு நீங்கள் பதிலளிக்க வேண்டும்” என்ற நமது தொடரின் இறுதி நாளை நாம் அடைந்துள்ளோம்.

இன்று நாம் சிந்திக்கப்போகும் ஒரு கேள்விக்கான பதில் மிகவும் தெளிவானது; சொல்லப்போனால், இவ்வளவு வெளிப்படையான பதில் கொண்ட ஒரு கேள்வியை இயேசு ஏன் கேட்டார் என்று கூட உங்களை வியக்க வைக்கும்.

இயேசு எரிகோவை விட்டுப் புறப்படும்போது, பர்திமேயு என்னும் பார்வையற்றவர், “தாவீதின் குமாரனே, எனக்கு இரங்கும் என்று முன்னிலும் அதிகமாய்க் கூப்பிட்டான்” (மாற்கு 10:48). அவர் இயேசுவினிடத்தில் கொண்டு வரப்பட்டபோது, அவர்: "நான் உனக்கு என்ன செய்யவேண்டும் என்றிருக்கிறாய்?" என்று கேட்டார்.

பர்திமேயு, "நான் பார்வையடைய வேண்டும்" (மாற்கு 10:51) என்று கூறியது யாருக்கும் ஆச்சரியத்தை அளிக்கப்போவதில்லை. ஒரு பார்வையற்றவர் தனது பார்வையைத் திரும்ப பெறுவதை விட வேறெதை அதிகம் விரும்புவார்?! 🤦🏼‍♀️

ஆனால் நீங்கள் சிந்தித்துப் பார்த்தால், அவருடைய பதில் உண்மையில் சில நுட்பங்கள் நிறைந்தது. தனது பார்வையை மீட்டெடுக்குமாறு பர்திமேயு இயேசுவிடம் கேட்டார் என்றால், இயேசுவால் அத்தகைய அற்புதத்தைச் செய்ய முடியும் என்று அவர் நம்பியிருக்க வேண்டும். அவருடைய பதில், அவருடைய மிகப்பெரிய விருப்பமான 'பார்வை பெறுவதை' மட்டும் வெளிப்படுத்தாமல், இயேசுவைத் தனது சுகமளிப்பவராக அவர் கொண்ட மாபெரும் விசுவாசத்தையும் வெளிப்படுத்தியது.

பர்திமேயு வீதியில் வேறு யாரிடமாவது தனது பார்வையை மீட்டுத் தருமாறு கேட்டிருப்பார் என்று நான் நினைக்கவில்லை. அவர் ஒரு பிச்சைக்காரராக இருந்தார்; அவர் மக்களிடம் பணம் கேட்டார். மற்ற எவராவது பர்திமேயுவுக்குக் கொடுக்கக்கூடியது வெறும் பணமாக மட்டுமே இருந்திருக்கும், ஆனால் இயேசு அவ்வாறல்ல; அவர் மிகவும் மேலானதை, அவர் எதை அதிகம் விரும்பினாரோ அதையே அவருக்குக் கொடுக்க வல்லவர்.

இயேசு உங்களிடமும் இதே கேள்வியைத் தான் கேட்கிறார்: "நான் உனக்கு என்ன செய்யவேண்டும் என்றிருக்கிறாய்?" உங்கள் இதயத்தின் ஆழமான விருப்பம் எது? அதை இயேசுவால் செய்ய முடியும் என்று நீங்கள் நம்புகிறீர்களா?