ஒரு பெரும் கொலையாளியின் மகளை ஆண்டவர் பயன்படுத்த முடியுமா?
சில நேரங்களில் நான், "தேவன் என்னை எப்படிப் பயன்படுத்த முடியும்?" என்று வியப்பதுண்டு.
எனது குறைகளையும் பலவீனங்களையும் மற்ற எவரையும் விட நான் நன்றாக அறிவேன், அவற்றைப் பற்றி நான் சிந்திக்கும்போது, தேவன் இப்போதும் தனது ராஜ்யத்திற்காக என்னைப் போன்ற ஒருவரைத் தேர்ந்தெடுத்து பயன்படுத்துவது எனக்கு ஆச்சரியமாக இருக்கிறது.
சற்றும் எதிர்பார்க்க முடியாத நபர்களைத் தேவன் அசாதாரணமான வழிகளில் பயன்படுத்திய கதைகளால் வேதாகமம் நிறைந்துள்ளது. அவர்களுள் ஒருவர் எகிப்து பார்வோனின் மகள்; அவர் மோசேயைக் காப்பாற்றி, தனது சொந்த மகனாக வளர்த்தெடுத்தார் (யாத்திராகமம் 2).
நீங்கள் கொல்லப்படவிருக்கும் ஒரு சூழ்நிலையில், உங்களைக் கொல்ல முயற்சிக்கும் நபரின் மகளே உங்களைக் காப்பாற்றுவார் என்று நீங்கள் கடைசிவரை எதிர்பார்க்க மாட்டீர்கள். ஆனாலும், மோசேயின் வாழ்க்கையில் அதுதான் நடந்தது.
இஸ்ரவேல் மக்கள் எகிப்தியர்களை விட எண்ணிக்கையில் அதிகமாகி மிகவும் பலமுள்ளவர்களாக வளர்ந்து விடுவார்கள் என்று எகிப்தின் பார்வோன் பயந்தான், எனவே எபிரெய ஆண் குழந்தைகள் அனைவரும் கொல்லப்பட வேண்டும் என்று அவன் கட்டளையிட்டான் (யாத்திராகமம் 1:9-10, 22). அந்த இரத்தவெறி பிடித்த பார்வோனின் மகளாலேயே மோசே அற்புதமாகத் தப்புவிக்கப்பட்டார்.
நம்பிக்கையே இழந்தது போலத் தெரிந்த, அப்பாவி குழந்தைகள் படுகொலை செய்யப்பட்ட அந்த முழுமையான இருண்ட காலத்தில், தேவன் சற்றும் எதிர்பாராத ஒரு இடத்திலிருந்து உதவியை அனுப்பினார்.
பொல்லாத, எதிர்மறையான மற்றும் இரக்கமற்ற ஒரு மனிதனின் மகளையே தேவன் பயன்படுத்த முடியும் என்றால், அவர் நிச்சயமாக உங்களையும் என்னையும் பயன்படுத்த முடியும்.
மோசே இருந்த பெட்டியை அவள் திறந்தபோது, அவனைக் கண்டு அவன் மேல் இரக்கங்கொண்டாள் (யாத்திராகமம் 2:6).
தேவனால் பயன்படுத்தப்படுவது என்பது பொதுவாக, யாருக்கு நீங்கள் ஊழியஞ்செய்ய வேண்டும் என்று தேவன் விரும்புகிறாரோ, அவர்கள் மீது மனதுருக்கம் கொள்வதில் இருந்தே தொடங்குகிறது.
நீங்கள் யார் மீது மனதுருக்கம் கொள்கிறீர்கள்?
மனதுருக்கம் (Compassion) என்பது ஒருவர் மீது பரிதாபப்படுவது மட்டுமல்ல, அது அன்பிலிருந்து பிறந்து நம்மைச் செயல்படத் தூண்டுவதாகும்.
நானும் கேம்ரனும் எங்கள் வாசகர்களாகிய உங்கள் மீது அன்பு கலந்த மனதுருக்கம் கொண்டுள்ளோம்; ஒவ்வொரு நாளையும் நீங்கள் தேவனோடு தொடங்குவதற்கு உங்களுக்கு உதவுவதை நாங்கள் நேசிக்கிறோம்.
