என் ஆற்றல் குறையும்போது… 🪫

நேற்று, ஒரே நாளில் இயேசு எதிர்கொண்ட மிகப்பெரிய அழுத்தத்தைப் பற்றி சிந்தித்தோம். இன்று, அவர் அந்தச் சவால்களை எப்படி கையாண்டார் என்பதையும், அந்த தத்துவங்களை நம்முடைய சொந்த வாழ்க்கையில் எப்படிப் பயன்படுத்தலாம் என்பதையும் ஆராய்வோம்.

பெரிய அழுத்தங்களைத் தாங்குவதற்கு இயேசு செய்த மிக முக்கியமான காரியங்களுள் ஒன்று, ஓய்வுக்கும் தேவனுடனான உறவுக்கும் முன்னுரிமை கொடுத்ததுதான். நெருக்கித் தள்ளும் மக்கள் கூட்டத்திற்கு நடுவில், தனது சீஷர்களைத் தனியே அழைத்து: "... வனாந்தரமான ஓரிடத்தில் தனித்து சற்றே இளைப்பாறும்படி போவோம் வாருங்கள் என்றார்”. மாற்கு 6:31

இயேசுவுக்குத் தற்புதுப்பித்தல் (recharge) தேவைப்பட்டது போலவே, நமக்கும் அது தேவை. நமது சரீரத்தையும் ஆத்துமாவையும் பேணுவது அவசியமானது.

அதில் ஒரு முக்கியமான பகுதி என்னவென்றால், நமது முன்னுரிமைகளைச் சரியாக வைத்திருப்பதாகும். பல பெரிய கிறிஸ்தவத் தலைவர்கள் இதில் தவறு செய்வதைக் கண்டு நான் பெரும்பாலும் ஆச்சரியப்படுகிறேன்.

சில நேரங்களில் மக்கள் தங்கள் அழைப்பு அல்லது ஊழியமே முதல் முன்னுரிமை என்று நம்புகிறார்கள், ஆனால் தேவன் அதை அப்படிப் பார்ப்பதில்லை. உங்கள் சபை எவ்வளவு பெரியதாக இருந்தாலும் அல்லது உங்கள் ஊழியம் எவ்வளவு செல்வாக்கு மிக்கதாக இருந்தாலும், வாழ்க்கையில் மிக முக்கியமான விஷயம் தேவனுடனான உங்கள் தனிப்பட்ட உறவும் அவருடனான பயணமும் மட்டுமே (லூக்கா 10:41-42).

அதற்குப் பிறகு, ஒரு வாழ்க்கைத் துணையாகவும், பெற்றோராகவும் (இருப்பீர்களானால்) இருக்கும் உங்கள் பங்கு வருகிறது. பின்னர், உங்களைச் சுற்றியுள்ளவர்களுக்கு ஒரு நண்பராக/தோழியாக இருப்பதும், இறுதியாக உங்கள் வேலை அல்லது ஊழியமும் வருகிறது.

இயேசுவும் தனது பலத்தையும் முன்னுரிமையையும் தேவனிடமே கண்டடைந்தார். ஜெபத்தின் மூலமும் தனிமையின் மூலமும் அவர் பிதாவுடன் இணைந்திருந்தார். குழப்பங்களுக்கு மத்தியிலும், அவர் தனித்துச் சென்று தேவனுடைய பிரசன்னத்தைத் தேட நேரம் ஒதுக்கினார்:

"அவர் ஜனங்களை அனுப்பிவிட்டபின்பு, தனித்து ஜெபம்பண்ண ஒரு மலையின்மேல் ஏறி, சாயங்காலமானபோது அங்கே தனிமையாயிருந்தார்." – மத்தேயு 14:23

நாமும் கூட, குழப்பங்களுக்கு மத்தியில் தேவனை மீண்டும் நோக்குவதன் மூலம் அவரிடத்தில் பலத்தைக் கண்டடைய முடியும். இயேசு இதற்கு ஒரு மிகச்சிறந்த முன்மாதிரியாகத் திகழ்ந்தார், நாமும் அவரது முன்மாதிரியைப் பின்பற்றலாம்.

நாம் இணைந்து ஜெபிப்போம்: பரலோகப் பிதாவே, எங்கள் வாழ்க்கையை சரியாக வரிசைப்படுத்தவும், உம்மிடத்தில் எங்கள் பலத்தைக் கண்டடையவும் எங்களுக்கு உதவி செய்யும். எங்களது பரபரப்பான வாழ்க்கையின் மத்தியில் ஆரோக்கியமான எல்லைகளை வகுக்கவும், உமது பிரசன்னத்தைத் தேடவும் எங்களுக்குக் கற்றுத்தாரும். எங்களது அடைக்கலமாகவும் பலமாகவும் இருப்பதற்காக உமக்கு நன்றி. இயேசுவின் நாமத்தில், ஆமென்.