கூடாரத்திற்குள் ஒளிந்திருந்த செய்திகள் ⛺️

இஸ்ரவேல் மக்கள் எகிப்தை விட்டு வெளியேறிய சில காலத்திற்குள்ளேயே, மோசே தேவனுக்கு ஒரு பரிசுத்த வாசஸ்தலத்தை கட்டும்படி அவரிடமிருந்து கட்டளைகளைப் பெற்றார்: அதுவே மோசேயின் கூடாரம் அல்லது ஆசரிப்பு கூடாரம் ஆகும் (யாத்திராகமம் 25 முதற்கொண்டு வாசியுங்கள்). சந்திக்கும் இடம் என்றும் அழைக்கப்படும் இந்த வாசஸ்தலம், அவர்கள் எங்கு பாளையமிறங்கினாலும் தங்களது பாளையத்தின் மையப்பகுதியில் அமைத்துக் கொள்ளக்கூடிய ஒரு நகரத்தக்க அமைப்பாக இருந்தது.

இந்தக் கட்டளைகள் மிகவும் நீண்டதாகவும் அலுப்பூட்டுவதாகவும் இருக்கின்றன, ஆனால் அது காரணமின்றி அப்படி இருக்கவில்லை; இந்த ஆசரிப்புக் கூடாரத்தின் ஒவ்வொரு அம்சமும் இயேசுவை நோக்கியே சுட்டிக்காட்டுகிறது. உதாரணத்திற்கு, இந்தக் கூடாரத்திற்கு ஒரே ஒரு வாசல் மட்டுமே இருந்தது, அது யூதா கோத்திரத்தாரின் பாளையத்தை நோக்கி அமைந்திருந்தது; இது தேவனிடம் செல்வதற்கான ஒரே வழியாய் இருக்கிற, யூதா கோத்திரத்துச் சிங்கமாகிய இயேசுவைக் குறிக்கிறது (யோவான் 14:6).

இது ஆசரிப்புக் கூடாரத்தில் மறைந்திருக்கும் பல விஷயங்களுள் ஒன்று மட்டுமே; அதன் ஒட்டுமொத்தக் கட்டுமானம், பயன்படுத்தப்பட்ட பொருட்கள் மற்றும் நிறங்கள், எண்கள், அளவீடுகள் என அனைத்தும் இயேசுவையும் நம் மேல் அவர் வைத்துள்ள அன்பையும் சுட்டிக்காட்டும் அடையாளங்களால் நிரம்பியுள்ளன—இன்றைய அதிசயத்தில் இதையெல்லாம் முழுமையாக விவரிப்பது என்பது இயலாத ஒன்று.

ஆனால், பலரும் அறிந்திராத ஒரு மிகச் சிறப்பான பிரதிபலிப்பை நான் சுட்டிக்காட்ட விரும்புகிறேன். மக்கள் ஆசரிப்புக் கூடாரத்தை எப்படி உருவாக்க வேண்டும் என்பதற்கான குறிப்பிட்ட கட்டளைகளைக் பெற்றது மட்டுமன்றி, அதைச் சுற்றி எவ்வாறு பாளையமிறங்க வேண்டும் என்பதற்கான கட்டளைகளையும் பெற்றிருந்தார்கள். எண்ணாகமம் 2-ஆம் அதிகாரத்தில், ஒவ்வொரு கோத்திரத்தாரும் எங்குப் பாளையமிறங்க வேண்டும் மற்றும் அவர்களில் எத்தனை பேர் எண்ணப்பட்டார்கள் என்பதை நாம் வாசிக்கிறோம் (எண்ணாகமம் 2). நீங்கள் அந்த எண்களைக் கூட்டிப் பார்த்தால், எல்லாப் பக்கங்களிலும் உள்ள பாளையங்கள் ஒரே அளவில் இல்லை என்பதை உங்களால் காண முடியும்; ஒரு பக்கம் கணிசமான அளவில் பெரியதாக இருந்தது.

இந்த ஏற்றத்தாழ்விற்கு ஒரு காரணம் இருந்தது: நீங்கள் நம்பினாலும் நம்பாவிட்டாலும், எண்ணாகமம் 2-இல் விவரிக்கப்பட்டுள்ளபடி அந்தப் பாளையங்களின் அளவை ஒரு வரைபடமாக வரைந்தால், அது ஒரு… சிலுவையின் வடிவில் அமையும்!! ✝️😱

இயேசு சிலுவையில் மரிப்பதற்குப் பல நூற்றாண்டுகளுக்கு முன்பே, அவருடைய உன்னதமான தியாகத்தின் அடையாளம் இஸ்ரவேல் மக்களுக்கு இடையே ஏற்கனவே காணக்கூடியதாக இருந்தது.

இது வியக்கத்தக்கதாக இல்லையா? யுகங்கள் முழுவதிலும் நீங்கள் அவருடைய நினைவில் இருந்திருக்கிறீர்கள்!