தேவன் பரலோகத்திலிருந்து காரியங்களை அப்படியே கீழே இறக்கினால் எவ்வளவு நன்றாக இருக்கும்!

உங்களுக்கு உண்மையிலேயே தேவைப்பட்ட அல்லது நீங்கள் மிகவும் விரும்பிய ஒன்றிற்காக நீங்கள் ஜெபித்து, அது அப்படியே பரலோகத்திலிருந்து நேரடியாக உங்கள் மடியில் விழுந்தது போன்ற அனுபவம் உங்களுக்கு எப்போதாவது உண்டாகியிருக்கிறதா?

எனக்கு அப்படி ஒருபோதும் நடந்ததில்லை, ஆனால் ஒரு நாள் அப்படி ஒரு அனுபவத்தைப் பெற நான் விரும்புகிறேன்!

இருப்பினும், இஸ்ரவேலர்கள் வனாந்தரத்தில் பசியாய் இருந்தபோது, உணவிற்காக தேவனை நோக்கி ஜெபித்த தருணத்தில் அவர்களுக்கு அப்படிப்பட்ட ஒரு அனுபவம் கிடைத்தது; பரலோகத்திலிருந்து அவர்களுக்கு மன்னா மழையாகப் பொழிந்தது (யாத்திராகமம் 16:2-5).

‘மன்னா’ என்றால் ‘இது என்ன?’ என்று அர்த்தம். ஏனென்றால், இஸ்ரவேலர்கள் அதைத் தங்களுக்குள் பெற்றுக்கொண்டபோது அப்படி ஒரு கேள்வியையே கேட்டுக்கொண்டார்கள். அவர்கள் அதற்கு முன்பு அதுபோன்ற ஒன்றை ஒருபோதும் கண்டதில்லை. அது கொத்தமல்லி விதையைப் போலத் தோற்றமளித்த, தேன் அப்பத்தின் சுவைகொண்ட ஒரு அப்பமாக இருந்தது.🧐 அவர்கள் வனாந்தரத்தில் அலைந்து திரிந்த 40 வருடங்களுக்கு, பரலோகத்திலிருந்து கிடைத்த ஒரு அற்புதமாகிய இந்த மன்னாவைக் கொண்டே உயிர் பிழைத்திருந்தார்கள்.

பரலோகத்திலிருந்து கிடைத்த இந்த அற்புத மன்னாவின் கதை தலைமுறை தலைமுறையாக சொல்லப்பட்டு வந்தது, மேலும் பல நூற்றாண்டுகளுக்குப் பிறகு, உணவு வழங்கப்பட்ட மற்றொரு பெரிய அற்புதம் நிகழ்ந்தபோது மக்கள் அதை நினைவுகூர்ந்தார்கள்: இயேசு அப்பங்களையும் மீன்களையும் பெருகச் செய்து, 5000 பேர் கொண்ட ஒரு பெரிய கூட்டத்திற்கு உணவளித்தார் (யோவான் 6).

மக்கள் ஒருவரையொருவர், “இவர் யார்?” என்று கேட்டுக்கொண்டார்கள்.

இயேசு அவர்களுக்கு இவ்வாறு விளக்குகிறார்:

“ஜீவ அப்பம் நானே, உங்கள் பிதாக்கள் வனாந்தரத்திலே மன்னாவைப் புசித்திருந்தும் மரித்தார்கள். இதிலே புசிக்கிறவன் மரியாமலிருக்கும்படி வானத்திலிருந்திறங்கின அப்பம் இதுவே. நானே வானத்திலிருந்திறங்கின ஜீவஅப்பம்; இந்த அப்பத்தைப் புசிக்கிறவன் என்றென்றைக்கும் பிழைப்பான்; நான் கொடுக்கும் அப்பம் உலகத்தின் ஜீவனுக்காக நான் கொடுக்கும் என் மாம்சமே என்றார்.” – யோவான் 6:48-51

வனாந்தரத்தின் மன்னா, இயேசுவின் ஒரு பிரதிபலிப்பாக இருக்கிறது.  வனாந்தரத்தில் தேவன் வழங்கிய அப்பம் அவருடைய மக்களுக்கு சரீரப் பிரகாரமான ஜீவனைக் கொடுத்தது போலவே, ஜீவ அப்பமாகிய இயேசு நமக்கு நித்திய ஜீவனைத் தருகிறார்.

மன்னா வனாந்தரத்தில் மக்கள் உயிர்வாழ்வதற்குத் தேவையான அனைத்து ஆற்றலையும் ஊட்டச்சத்துகளையும் வழங்கியது போலவே, நாமும் நம்மைத் தாங்குவதற்குத் தேவையான அனைத்தையும் இயேசுவிடமே கண்டுகொள்ள முடியும்.