நன்றி செலுத்துவதற்கு உங்களிடம் ஏதேனும் இருக்கிறதா?

இந்த வாரம், தாவீது ராஜா தனது வாழ்க்கையின் மிகச் சோர்வான நிலையில் இருந்தபோது, கர்த்தருக்குள் தன்னை எவ்வாறு திடப்படுத்திக்கொண்டார் என்பதை கண்டறியும் ஒரு பயணத்தில் நாம் சென்றுகொண்டிருக்கிறோம் (1 சாமுவேல் 30:6).

தாவீது கர்த்தருக்குள் தன்னைத் திடப்படுத்திக்கொள்ளத் தேர்ந்தெடுத்தபோது, அவருக்கு எந்தக் கவலையும் இல்லாமல் இருக்கவில்லை. நேற்று நாம் பார்த்தது போல, அவருடைய மனதை ஆக்கிரமித்த விஷயங்கள் பல இருந்தன: கற்பனை செய்ய முடியாத இழப்புகளைச் சந்தித்த ஒரு படையின் தலைவனாக அவர் இருந்தார், மேலும் அவருடைய சொந்த மக்களே அவர் மீது மிகவும் கோபமடைந்து அவரைக் கல்லெறிய விரும்பினார்கள்.

நீங்கள் சமாதானமாக இருக்கும்போது திட நம்பிக்கையுடன் உணர்வது சுலபம், ஆனால் கவலைகள் உங்களைச் சூழ்ந்திருக்கும்போது நீங்கள் என்ன செய்வீர்கள்?

இன்றைய முக்கியக் கருத்து: யோசிப்பதில் இருந்து நன்றி செலுத்துவதற்கு வாருங்கள்.

தாவீது இவ்வாறு கூறுகிறார்:

“கர்த்தர் எனக்காக யாவையும் செய்து முடிப்பார்; கர்த்தாவே, உமது கிருபை என்றுமுள்ளது; உமது கரத்தின் கிரியைகளை நெகிழவிடாதிருப்பீராக.” – சங்கீதம் 138:8

தாவீதுக்கு எந்தக் கவலையும் இல்லை என்று இல்லை, மாறாக அவருக்கு நிறைய கவலைகள் இருந்தன, ஆனால் தேவன் அவற்றைப் பார்த்துக்கொள்வார் என்று அவர் நம்பினார், மேலும் அதற்குப் பதிலாக நன்றியுள்ளவனாக இருக்கத் தேர்ந்தெடுத்தார்.

தாவீது நன்றியுணர்வு நிறைந்த பல சங்கீதங்களை எழுதினார்; அவற்றில் மிகவும் புகழ்பெற்றவை சங்கீதம் 100, சங்கீதம் 103, மற்றும் சங்கீதம் 138. 

நன்றி செலுத்துவது என்பது உங்கள் கவனத்தை சொந்தச் சூழ்நிலைகளிலிருந்து அகில உலகத்தையும் படைத்த தேவனிடம் திருப்புவதற்கான ஒரு சிறந்த வழி என்பதை தாவீது அறிந்திருந்தார். நீங்களும் அதையே செய்யுமாறு நான் உங்களை ஊக்குவிக்கிறேன்! தாவீது சொன்னது போல:

“அவர் வாசல்களில் துதியோடும், அவர் பிராகாரங்களில் புகழ்ச்சியோடும் பிரவேசித்து, அவரைத் துதித்து, அவருடைய நாமத்தை ஸ்தோத்திரியுங்கள். கர்த்தர் நல்லவர், அவருடைய கிருபை என்றென்றைக்கும், அவருடைய உண்மை தலைமுறை தலைமுறைக்கும் உள்ளது.” சங்கீதம் 100:4-5

நன்றியுள்ள மனப்பான்மையை வளர்த்துக்கொள்ள நீங்கள் போராடினால் அல்லது இன்றைய செய்தி உங்கள் சொந்த வாழ்க்கையில் நன்றி செலுத்துதலை நடைமுறையாக்க உங்களை ஏவியிருந்தால், உங்களுக்கு உதவ என்னிடம் ஒரு சிறந்த கருவி உள்ளது: YouVersion பைபிள் செயலியில் உள்ள 'நிகரில்லாத நன்றியுணர்வை பற்றிய 7 கதைகள்' என்ற வேதாகம வாசிப்புத் திட்டம்தான் அது.

உங்களுக்காக நான் நன்றியுள்ளவனாக இருக்கிறேன்!