பள்ளியில் கடைசியாகத் தேர்ந்தெடுக்கப்படுவதன் பயம்

உங்கள் பள்ளி நாட்களில் (அல்லது வாழ்க்கையின் பிற்பகுதியில்), எதற்காவது கடைசியாகத் தேர்ந்தெடுக்கப்பட்ட நபராக நீங்கள் இருந்ததுண்டா?

உங்கள் நண்பர்கள் அனைவரும் உங்களுக்கு முன்னால் அணிகளில் தேர்ந்தெடுக்கும்போது அது ஒரு சிறுவயது விளையாட்டாக இருந்திருக்கலாம், அல்லது ஒரு பெரியவராக, பதவி உயர்வில் நீங்கள் புறக்கணிக்கப்பட்டிருக்கலாம்.

உடற்பயிற்சி வகுப்பின் போது தேர்ந்தெடுக்கப்படுபவர்களில் நான் எப்போதும் கடைசியில் இருப்பேன், இன்றைக்கும் அந்த நினைவுகள் என் மனதில் வலியை ஏற்படுத்தக்கூடும்.

நீங்களும் அவ்வாறே உணர்ந்தால், நீங்கள் பிடித்துக்கொள்ளக்கூடிய மிகவும் வல்லமையான உண்மைகளுள் ஒன்று, நீங்கள் இயேசுவால் தேர்ந்தெடுக்கப்பட்டவர் என்பதாகும்.

நம்மை மற்றவர்களுடன் ஒப்பிடும்போதோ அல்லது மற்றொருவரைப் போல நாம் பிரபலமாகவோ செல்வாக்கு உள்ளவராகவோ இல்லை என்று உணரும்போதோ நமது அடையாளத்தின் மீது நமக்குள்ள மதிப்பும் நம்பிக்கையும் பெரும்பாலும் அசைக்கப்படுகிறது. ஆனால் ஒப்பீடு உண்மையைச் சிதைக்கிறது.

இயேசு ஒருபோதும் நம்மை மற்றவர்களுடன் அளவிடுவதில்லை—அவர் நம்மை தனிப்பட்ட முறையில் அழைக்கிறார், ஏனென்றால் அவர் நம்மை முதலாவதாக தேர்ந்தெடுக்கிறார்.

இயேசுவின் பூலோக ஊழியத்தின் போது அவரைச் சுற்றிப் பல மனிதர்கள் இருந்தனர், ஆயினும் அவர் நோக்கமாகத் தம்முடைய 12 சீஷர்களைத் தேர்ந்தெடுத்தார். இதில் பெயர் அதிகம் குறிப்பிடப்படாத பிரபலமற்றவர்களும் அடங்குவர். ஆனால் அவர்களின் பிரபலமின்மை அவர்களைத் தகுதியற்றவர்களாக்கவில்லை; இயேசுவின் தேர்வின் நோக்கத்தை அது உயர்த்திக் காட்டியது. இயேசு கூறுகிறார்:

“நீங்கள் என்னைத் தெரிந்துகொள்ளவில்லை, நான் உங்களைத் தெரிந்துகொண்டேன்; … நீங்கள் போய்க் கனிகொடுக்கும்படிக்கும், உங்கள் கனி நிலைத்திருக்கும்படிக்கும், நான் உங்களை ஏற்படுத்தினேன்.” – யோவான் 15:16 

நமது அழைப்பு தேவனுடைய முயற்சியில் வேரூன்றியதே தவிர, நமது செயல்திறனில் அல்ல என்பதை இந்த வசனம் நினைவூட்டுகிறது. அவருடைய குடும்பத்தில் நமது இடத்தை நாம் சம்பாதிக்கவில்லை. நாம் அதற்குள் அழைக்கப்பட்டோம். இந்த உண்மை நமது நோக்கத்தை நாம் பார்க்கும் விதத்தை மாற்றியமைக்கிறது.

அடுத்த முறை நீங்கள் புறக்கணிக்கப்பட்டதாக உணரும்போது, உங்களுக்கு நினைவூட்டிக் கொள்ளுங்கள்: நான் மறக்கப்படவில்லை—நான் தேர்ந்தெடுக்கப்பட்டவன்/தேர்ந்தெடுக்கப்பட்டவள். நீங்கள் முக்கியத்துவமற்றவர் என்று உணரும்போது, நினைவூட்டிக் கொள்ளுங்கள்: நான் ஏற்படுத்தப்பட்டிருக்கிறேன். என் வாழ்க்கை தற்செயலானது அல்ல; அது நோக்கமுடையது.

தேவனுடைய ராஜ்யத்தில் கனிகொடுப்பது என்பது எப்போதும் பொது மேடைகளாகவோ அல்லது வெளிப்புற வெற்றியாகவோ இருப்பதில்லை. சில நேரங்களில் அது நிலைத்தன்மை, விசுவாசம், ஜெபம், ஊக்கம் மற்றும் அமைதியான கீழ்ப்படிதல் போல இருக்கும். மேலும் அவை தேவனுக்கு மிகவும் முக்கியமானவை.

‘மேடைகள் vs தூண்கள்' என்ற தலைப்பில் கேம்ரன் ஒரு அழகான வேதாகம வாசிப்புத் திட்டத்தை எழுதியுள்ளார். நீங்கள் அதை வாசிக்க வேண்டும்!